មន្ត្រីជាន់ខ្ពស់ក្រសួងការងារនិងបណ្តុះបណ្តាលវិជ្ជាជីវៈចុះពិនិត្យការធ្វើតេស្តទទួល ស្គាល់ជំនាញ(RPL)ជូនពលករមកពីប្រទេសថៃដោយការចំណាយជាបន្ទុករបស់រាជរដ្ឋាភិបាលឯកឧត្តម បណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុក អគ្គនាយកអប់រំ បណ្តុះបណ្តាលបច្ចេកទេស និងវិជ្ជាជីវៈ និង លោក លោក ម៉ែន អេង អភិបាលរង តំណាងឯកឧត្តម ប៉េង ពោធិ៍សា អភិបាលខេត្តស្វាយរៀង រួមនិងលោក លោកស្រី ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ ថ្នាក់ដឹកនាំមន្ទីរ អង្គពាក់ព័ន្ធ តំណាងក្រុមហ៊ុន នៅថ្ងៃទី ២៥ ខែមេសា ឆ្នាំ២០២៦ បានអញ្ជើញចុះពិនិត្យ នូវដំណើរការធ្វើតេស្ត «ការទទួលស្គាល់ជំនាញពីមុន (RPL) របស់អតីតពលករខ្មែរមកពីប្រទេសថៃ» នៅវិទ្យាស្ថានពហុបច្ចេកទេសភូមិភាគតេជោសែនស្វាយរៀង។ឯកឧត្តម បណ្ឌិត ហ៊ីង ស៊ីដេត បានបញ្ជាក់ថា កម្មវិធី RPL នេះ គឺជាការអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី ដែលផ្តល់ឱកាសមាសដល់អតីតពលករមកពីប្រទេសថៃ ចំនួន ១ម៉ឺននាក់ ក្នុងជំហានទី១ ឱ្យទទួលបានការធ្វើតេស្តបញ្ជាក់សមត្ថភាពលើមុខជំនាញចំនួន ៨ ដោយមិនគិតថ្លៃ។ គោលដៅសំខាន់គឺប្រែក្លាយពី «ជំនាញដែលមើលឃើញ» ឱ្យទៅជា «សញ្ញាបត្រផ្លូវការ» ដើម្បី៖ -បង្កើនផលិតភាព និងភាពប្រកួតប្រជែង ក្នុងទីផ្សារការងារ។ -ផ្តល់ឱកាសចំណូលខ្ពស់៖ ជួយឱ្យបងប្អូនមានលទ្ធភាពទទួលបានការងារល្អ និងប្រាក់បៀវត្សសមរម្យទាំងក្នុង និងក្រៅប្រទេស និងការគាំពារសង្គម៖ ក្លាយជាពលករក្នុងប្រព័ន្ធ ដែលទទួលបានអត្ថប្រយោជន៍ពី ប.ស.ស.។ឯកឧត្តមបណ្ឌិតបានបន្តថា ការចុះពិនិត្យការធ្វើតេស្តនាពេលនេះ គឺជាការវាស់ស្ទង់នូវគុណភាព និងប្រសិទ្ធភាពនៃកម្មវិធី RPL ដែលកំពុងដំណើរការក្នុងរាជធានី-ខេត្តគោលដៅចំនួន ៦ រួមមាន៖ ស្វាយរៀង, បាត់ដំបង, បន្ទាយមានជ័យ, សៀមរាប, តាកែវ និងរាជធានីភ្នំពេញ។ ប្រសិនបើលទ្ធផលនៃជំហានទី១ នេះសម្រេចបានជោគជ័យ ក្រសួងនឹងបន្តពង្រីកជំហានទី២ ដើម្បីឱ្យបងប្អូនពលករនៅទូទាំងប្រទេសកាន់តែច្រើនបន្ថែមទៀត ទទួលបានអត្ថប្រយោជន៍ពីកម្មវិធីនេះ។ទន្ទឹមនឹងនេះ ឯកឧត្តមបណ្ឌិតក៏បានផ្ដល់អនុសាសន៍ដល់ម្ចាស់សហគ្រាស និងរោងចក្រ ឱ្យរួមគ្នា-ប្រើប្រាស់ប្រព័ន្ធ RPL ជាមូលដ្ឋានក្នុងការជ្រើសរើសបុគ្គលិក និងកំណត់ប្រាក់ឈ្នួលឱ្យស្របតាមសមត្ថភាពពិត។ -អនុញ្ញាតឱ្យបុគ្គលិកបច្ចេកទេសចូលរួមបណ្តុះបណ្តាលក្លាយជា «អ្នកវាយតម្លៃជំនាញ» បន្តការផ្សព្វផ្សាយឱ្យដល់តំបន់ដាច់ស្រយាល និងព្រំដែន ដើម្បីឱ្យពលរដ្ឋគ្រប់រូបមានឱកាសទទួលបានការទទួលស្គាល់គុណវុឌ្ឍផ្លូវការ។